On it goes :D

15Nov2013

Hallo mini Liebe :)

De mitem jedi wuche schribe het leider nöd eso klappt, sorry. Sind eifach immer am umerenne und seich mache da une da blibt chum e minute für anders. Wasauimmer, ich fang glaub mal a verzelle was mir ide letste wuche so widerfahre isch :) under de wuche hemmer eich mehrheitlich s glich programm drum gani ez chli vertüft ufd wuchenend i!

Wuchenend vom 19./20. Oktober

Am samstig hemmer eus scho früe am morge ufgmacht zum s 'achsogeniale' sealife vo sydney erkunde.. Mis gastmami het mer richtig vorgschwärmt gha devo drum hani denkt ich gane obwohl ich eigetlich scho gsi bin in Konstanz. Mit de grösste erwartige und gspannte gsichter simmer denn schliesslich det acho und megamega entüscht worde. S isch richtig richtig richtig langwiilig gsi, d aquarie sind all mega trüeb und unbutzt gsi, so e richtigi chlini einöde halt. nach dere 40$ tüüre entüschig simmer denn grad go frust-wedges esse, das isch sochli euses hobby da une :) und nacheme erschöpfende shoppingtürli simmer imene superfeine italienische restaurant ide darling harbour go znachtesse Cool

Für all wo mal vorhend dete z'esse ;)
(Shop 114/Cockle Bay Wharf, Darling Harbour NSW 2000 ‎)

Da Sydney halt eifach cool isch, gits da auna es fürwerch all wuche am samstig abig und zur chrönig vom tag simmer denn natürlich na das go gnüsse.



Ui wenni zrugluege simmer richtig aktiv gsi das wuchenend, am sunntig simmer nemmlich in der frühe scho go manly besichtige :) für die wos nöd wüssed, das isch so de ussersti zipfel vo sidney im nordweste und s isch chli abglege, das heisst 30min fähre fahre oder e stund bus zum det usecho. Au det isch eus gseit worde dasses mega schön seg, und dasmal hets sogar zuetroffe, whaaaaaat?! :D s het sone mega herzigi promenade vode fährestation wo me denn direkt zum strand chunt... han leider kei bilder aber beguetachteds doch susch da, das isch au det dreit worde ;) aso ab 3.38: 

http://www.youtube.com/watch?v=1w9DiGlZksU

Sunnebade isch agseit gsi wel die chäsfarbige schwizer touriste wennd ja schliesslich so usgseh wie richtigi australier und nüme gfrögt werde 'where are you from?' (und wenn me mit de schwiz antwortet d folgefrag 'aaah are you the ones who live on trees?' alose müesse). Intelligent wie ich aber bin, het mich natürlich de schlaf übermannt und ich han en moment z lang ade sunne brutzlet, wasi mitem bösiste sunnebrand vo mim lebe han müesse bezahle und eme fette sunnestich. Sogar woni mi nach 1 tag wider id schuel getraut han bini doch na me oder weniger böd apöblet worde. aaaaber me lernt ja drus ;) oder au nöd.

Wuchenend 26./27. Oktober

Im Rückblick muessi echt zuege dassi en rechte lazy-ass bin. S wuchenend vom 26./27. hemmer nemmlich scho nüme so viel gmacht sondern sind sochli in fuulenzi-mood inegheit, wo bis ez ahaltet wenni ehrlich bin :) am samstig simmer uf paddington, das isch so en herzige stadtteil direkt neb de boni junction wos sochli vintage-shops und kafis het, würkli schnüsig, sochli wie winti es bizli :) dete hets am samstig immer sonen market sochli flomi-mässig aber irgendwie halt doch andersch ;) vili künstler verchaufed dete ihri bilder oder denn hets als wie immer chinese und japaner wo ramsch verchaufed und chleider und schmuck undundund.. sehr empfehlenswert zum aluege uf jede fall und wer chli vil förig geld het chan det natürli au go poste, s isch aber halt sehr übertürt wie australie halt so chli im allgemeine. Gefolgt isch die paddington-aktion gsi vomne fuule nami am strand, was mer so gmüetlich gfunde hend, dass mer am sunntig grad namal de ganz tag an bondi beach sind!

Wuchenend 2./3. November

Mitem November chömed langsam au die richtig heisse Temperature, drum simmer -geplagt von der hitze- 2 teg hinderenand an bronte beach wo direkt bi mir isch und hend wie immer es Barbie gnosse, gsünnelet und chli käfelet.. es richtig fuuls wuchenend :) hans ez au mega guet mit minere gastschwöster und sie nimmt mich au au und zue mal mit in uusgang und zu ihrne kollege -alles surfer verstaht sich ;). Am mentig druff (aso uf das wuchenend) het denn min gastpapi geburi gha und mer sind i sonen 'bowling club' go znachtesse und anes konzert vo sonere band wo irgendwelchi kollege vo ihm drin spiled, het eher nöd so min musiggschmack troffe aber er isch riichtig abgange! Ah falls ich das nanig verzellt han: mini gasteltere sind beid im musigbereich tätig, de gastvater isch so wienen zweitmanager oder was au immer für mehreri bands (Bliss N Eso underanderem, bechume gratistickets hihihi) und drum chömed au immer irgendwelchi wichtigi manager zu eus vo so berüemte alte amerikanische bands.. :) und jede abig underhaltet er sich öpe ei stund mit mir über musig woni nie kenne und brennt mer CD's und so :D uuuu herzig! Lucky me, mit de 2. gastfamilie hanis also würklich recht troffe ;) a dem mentig vo sim geburtstag sind denn aber tragischerwis auna zwei schüeler vonere schuel grad bi eus am bondi beach id welle cho, eine hend chöne rette aber de ander isch verschwunde und ersch am 11. nachher in manly agspüelt worde.


Am zistig isch denn na melbourne-cup gsi, das rossrenne und denn hemmer ide müesse 5$ abge, zwei rennross zie und am nami simmer all zeme is pub go s renne luege :D extreeeeeem viel lüt gha und all sind am umeschreie gsi mit ihrne wettzetteli ide hand, s isch aso recht lustig gsi. 

 

Wuchenend 8./9./10./11. November

s letzte wuchenend simmer uf melbourne. han sowieso welle dethiga, welli ja vo australie eich nüme viel gsehne. mir hend eich en andere roadtrip welle mache denn aber de hemmer abgseit weg zu schlechtem wetter, denn hani am mentig so gwitzlet mer chönted ja uf melbourne und am mittag hemmers denn buecht, de kari, de matthias, d carmen, de jonas und ich ;) ja, d lüt da sind spontan! am dunnstig abig simmer denn auscho abgfloge und spat ide nacht im 'nomadsallnations ' eme fürchterliche hostel ide stadt aacho :) am fritig hemmer eus denn dezue entschlosse das übliche sightseeing z mache und sind zersch an 'victoria market', sonen riiisige mert irgendwo in melbourne wo me alle möglich seich chan chaufe. da's sehr chlat und regnerisch (ja mir sind em rege doch nöd entcho..) gsi isch, simmer denn inen touribus ghockt und sind 2! mal umd stadt gfahre well mer so kei lust gha hend uf rege. Am abig simmer in eureka tower, sonen abzocki-tower wie z.b. s empire in new york. De usblick het zwar fasch scho em priis entsproche ;) aschlüssend simmer fein go znachtesse und denn ab is 'bequeme,subere' hostelbett wel der am samstig ja schliesslich früe hend welle go es auto abhole zum zude 10 apostles cho und d great ocean road gseh... wasauimmer, s auto hemmer nöd becho wel die vom reisebüro en mist gmacht het, drum hemmer de ganz morge demit verbracht chrampfhaft e underkunft z sueche, dass mer nöd hend müesse uf de strass schlafe und hend schliesslich es herzigs, türs apartment chli weg vom stadtchern gfunde wo mer denn au schnurstracks anesind und usserd us nahrigsmittelmangel-gründ au nüme verla hend (leider)... het denn halt zwei fuuli teg mit viel fernseh und viel guetem, selbergchochtem esse in melbourne ge.. s isch sehr lustig gsi aber alles in allem doch me oder weniger enttüschend für das viele geld wo ligeblibe isch...

 

  

Was ich völlig vergesse han sind d waldbränd! isch u krass, immer wenns wider stärcher werded schmöckt mes, am mittag isch denn jewils die ganz stadt verneblet und es hanget e apokalyptischi stimmig ide luft! Nur churz en iidruck dassers eu chönd vorstelle:

 

Aso das wers widermal gsi :D bis zum nechste mal (irgendwenn, verspriche besser mal nüt ;)) 

Küssend vermiss eu alli ganz fest

Ersti Iidrück

16Okt2013

Hallo meine Lieben :)

Ich han mich ez doch scho chli iglebt da une in Australie nach 4 Wücheli und han denkt denn verzell ich doch bi Glegeheit mal was mir da une so passiert, für die wo's interessiert.
Ich fang am beste mal ganz am Aafang a wel susch verlüri hoffnigslos de Überblick.

Nach 24 Stündli höchst unagnehmer Reis isch euses Flugi am 6i am Morge in Sydney glandet und de erst gedanke woni gha han isch eigetlich mal gsi: 'Was mach ich da?'. Es het sich denn usegstellt dass ich zersch mal han müesse zu mim Gastmameli de Faina Wax cho und zwar mitem ÖV was da liechter gseit als gmacht isch. Wenn denn mal en Bus chunt und du igstige bisch, bisch absolut verlore wel kein Busstop agschribe isch und du dich au nöd chasch a de zit orientiere wenn du muesch usstige wels ja ebe eifach irgendwenn chömed. Ich han denn aber irgendwie min weg zude Frau Wax navigiert gha. Wie sich usegstellt het isch sie e 66-jährigi Russin gsi, sie het recht schlecht Englisch chönne (vowege ga lieber ine Gastfamilie die chönd Englisch) undundund. Es het aber zum Glück na e anderi Schwizerin gha wo au bi ihre gwohnt het, d Anja und die het mi denn scho am erste Abig is Sydney nightlife igfüert :)

Nachdem ich übers Wuchenend chli di nöcher umgebig: Bondi Beach and Junction erkuntigt gha han ischs am Mentig denn au grad scho id Schuel gange. Wie sich usegstellt het sind öpe 90% vo allne Lüt ide Sprachschuel Schwiizer also na extremer als ich erwartet han aber d Lüt sind sehr cool und das isch ja das wo zellt. So han ich au d Carmen, d Nina und d Hanna kenneglernt. Mir sind ez so quasi 'die Gang' ;)

Sit denn het sich s lebe da eigetlich guet iipendlet! Nach zwei Wuche Jetlag lat sich s lebe eigetlich zimlich gnüsse da une :) Han denn di liebi Russin weg vile Gründ verla und lebe ez bide Moores, de Judi, em Barry und ihrere Tocher de Amye so zimli am schönste Ort wo me sich chan vorstelle ca. 5 min vom Bronte Beach weg! (Schönste Strand vo ganz Sydney, wenn nöd überhaubt ;) )

Da ich ez scho es wiili da bin und so viel erlebe hani leider nüme all Details present aaber d Routine lat sich eich churz und bündig zemefasse:

-BBQ zum Zmorge, Zmittag und Znacht

-Timtams, Frozen Yoghurt und allgemein eifach de ganz Tag esse

-Schule of course

-An Strand go brun werde (man beachte: 39grad im frühen Frühling)

-Id Stadt go fiire (Und nebebii Lüt wie de Typ vo LMFAO oder d Rihanna gse)

-Shoppe, Surfe oder d Stadt erkunde (wobi shoppe eher wegfallt well alles -hebed eu- TÜRER isch als ide Schwiz!!!)

 

 S einzig wo us dere Reihe vo Aktivitäte gross usbricht isch natürlich s Surfcamp gsi letst Wuche, wo so zimli alli vo Navitas (eusi Sprachschuel) aso vo Bondi und Manly gange sind :) Di ganz Gschicht het scho guet agfange wo mer nach eusere Akunft vom stockbetrunkne !schreiende! Campmanager sicher 13x druf ufmersam gmacht worde sind liislig z si. Das ganze isch recht amüsant gsi und existiert au uf video also falls ichs chan uuftribe wirds sicher mal postet!
Am nechste Morge ischs denn au scho früe zum Surfe gange i gruusige chalte nasse Wetsuits :D, was sich als genial usegstellt het! S het mer so viel Spass gmacht, dassi übermüetig worde bin und mis Brett id Welle grüert han unds mer als Antwort grad fadegrad is Gsicht gfloge isch, wasi mit starchem Nasenbluten und ere gschwullne Nase ha chöne ibüesse.  
Han mi denn aber glich wider anegwagt und so eigetlich würklich es zimlich perfekts Surfwuchenend verbracht :) 

 

Was auna erwähnenswert isch isch de Taronga-Zoo wo mer das Wuchenend anesind mit de Fähre :) Was mer eigetlich am beste gfalle het isch die unglaublich Ussicht uf s Zentrum vo Sydney und natürlich d Kängäruuuus, s must-see :) s isch die 52 Doller Itritt wo me het müesse also wert gsi!

S gebti na sooooo viel me z verzelle aber etzt gits zersch mal e witeri Wuche Schuel und ich versuech bi Möglichkeit jedi Wuche es chlises Update z mache dass die ganz Gschicht chli Schwung und früsche Geist bechunt :D Bis denn wers das ez, ich vermiss eu alli ganz fest und hoffe dassers gnüssed mit eune Schneemanne oder was au immer ihr sust mached <3 Byebye